الجزء الاول
هناء وامل في الحجرة الساعة وحدة الليل سهر لان بداية العطلة
هناء : اففففف ملل عدل
امل : أي والله متى اجي الساعة ثنتين تبتدي الحلقة
هناء : هذا احنا حلقة وراء حلقة مو مثل بنات الناس
امل ترفع حاجب : ليش يعني شنو ناقصنا ؟
هناء : يا خبلة قصدي ان حتى كمبيوتر ما عندنا
امل : بعد شنو نسوي
هناء وهي تفكر : امول حصلتها وهي تناقز فوق السرير حصلتها هي هي
امل وهي تبوس يدها : الحمد الله والشكر شنو حصلتين؟
هناء : شوفي امولة يا عمري يا حبيبتي .......
امل وهي تقاطع اختها : عمري وحبيبتي وراها شي قولي شعندش بدون مقدمات وخلصيني.
هناء : فاهمتني والله شوفي عمري انتي احين توش مستلمة الشهادة وما شاء الله عليش 93,2 على رغم انه ثالث اعدادي وحطو اسمش في الجريدة وفي مرتبة الشرف وابويي وااااااااجد مستانس
امل : انزين
هناء : شرايش تقولين الى ابويي هدية نجاحش الكمبيوتر وتقولين له ان بعد يساعدش في الدراسة ويزيد محصولش الدراسي
امل : لا لا ما احب اجذب على ابويي بقوله عشان ان احنا متمللين وجدي بس
هناء : أي شي بس اهم شي يوافق
امل : اوكي بنجرب بنشوف
هناء : اوكي . يالله امولة قومي قربت ثنتين خلنا نسوي لنا شي ناكله وبعدين نطالع الحلقة
ذهبت كل من هناء وامل وهم مستبشرين بالخير وعندهم امل ان ابوهم يوافق
اشرقت شمس الصباح على بيت ابو قاسم وعلى صوت الاحفاد الصغار
بتول وهي تفتح باب حجرة امها : السلام يمة شخبارش ؟وهي تبوس راس امها .
ام قاسم : الحمد الله بخير بنيتي وانتي شخبارش وشخبار عيالش ؟
بتول : الحمد الله زينين
دلال وهي تدخل وحاملة الشهادة : شخبارش يمة وهي تبوس راس جدتها
ام قاسم : هلا والله ببنتي حيالله دلال
دلال : يمة باركي لي اخذت كامل ممتاز ( على انها ثالث ابتدائي مو بالدرجات )
ام قاسم : الف الف مبروووك تستاهلين يا بيني وهي اطلع من بوقها ( المحفظة ) ربيتين ( 200 فلس ) : اخذي يا بنيتي وان شاء الله كل سنة .
دلال : شكرا يمة وتحبها فوق راسها وتروح تركض الى خواتها وخالها
دلال : ملاك فطوم عبود جدتي عطتني ربيتين ليش اني جبت ممتاز واطلع لهم السانها >>>>يعني تحسرهم
عبود : عادي انا عطتني ربيتين قبلكم لاني جبت ممتاز بعد
دلال وهي تحاول تستفزه : لكن اني كااااااااامل ممتاز انت عندك جيد جدا
عبود : لان انا صف رابع لكن انتي ثالث بنشوفش الى رحتي رابع شنو بسوين
دلال : بلعت ريجها وسكتت
اما ملاك وفطوم راحو يركظون الى جدتهم الحنونة وسلمو عليها وباسوها
فطوم بطبيعتها الربشة والشيطانة تكلمت : يمة ليش بس تعطين دلال ؟
بتول : دلال دلال وصمخ ما لحقت السانها يحكها لو ما تقول لهم >> وهي معصبة
ام قاسم : لا خلها الجالهة مستانسة ولا يهمكم اخذي فطوم ربيتين( 200 فلس ) وملاك بعد ربيتين ( 200 فلس )
بتول : يمة ملاك ودلال يستاهلون لانهم شطار لكن هذي ام كشة ( فطوم ) ما تستاهل توهم متصليين فيني الروضة يشتكون من شطانتها عطيها بس ربية (100 فلس )
ام قاسم بقلبها الطيب : لا فطوم شاطرة بس هي كانت صغيرة احين صارت مرأة ولا بتسوي شطانة صح ؟
فطوم ببراءتها وابتسامة عريضة : اييييييي وتروح تركض عند خواتها وخالها عبود.
بتول : يمه وين امل وهناء ما نسمع لهم صوت ؟
ام قاسم : بعد الاجازة احين وكل سهر وما يقعدون من وقت
بتول : بس ما يصير شوفي الساعة وحدة الظهر
ام قاسم : شسوي معاهم لو حتى بقعدهم بيكسرون خاطري واني اشوف في عيونهم النوم
بتول : خلي دلعش لهم ينفعش
الا بصوت حشرة وازعاج برى الا زهاير ( زهراء بنت منى ) واصلة الا بصوت منى وهي تفتح الباب : السلام عليكم
بتول وام قاسم : وعليكم السلام
منى وهي تبوس امها واختها : شخباركم ؟
ام قاسم وبتول : الحمد الله
منى : غريبة ما اسمع حشرة امول وهناء
بتول وهي تحاوس فمها : نايمين حضرتهم
منى وهي تفتح عيونها وتضرب على صدرها : لحييييييييييين
بتول من طرف خشمها : امي تقول اجازة واكيد سهر يعني 100% القعدة متاخرة
منى : بروح اشوفهم
بتول : خذيني معاش بشوف شنو اخرتهم هالثنتين
ام قاسم تحرك راسها على تفكير بنتها بتول وطريقة معاملتها وكلامها لها
طراااااااااخ >>>>صوت فتح باب حجرة البنات
منى : يالله يالله قوموا قعدوا شوفوا الساعة كم
هناء وهي تحط للحاف فوق راسها وهي تتحلطم : افففف والله ناقصينهم احنا
بتول وهي تصفق : يالله يالله بلى تافاف وتحلطم وتسحب للحاف من على هناء
منى الى امل : يالله اماليز >>دلع اسم امل قومي وهي تحاوس في اذونها امل بطبيعتها الهادئة والمتواضعة : ان شاء الله
وتقعد على السرير وتسلم على خواتها وتبوسهم وكان سلامها على اختها بتول حار لان ما تشوفها الا من خميس الى خميس بسبب بعدها عن بيت ابوها اما منى فـ 24 ساعة موجودة في بيت ابوها لان بيتهم قريب
وما جت الساعة ثنتين الا الكل متجمعين على مائدة الطعام والضحك والسوالف ماخذة كل وقتهم طبعا ما عدا ابو قاسم الى على طول في الشغل
وبعد مرور ظهيرة هذا اليوم
رج المكان صوت الساعة تعلن العاشرة مساءا وقت وصول الوالد (ابو قاسم )
هذه هي قوانين العائلة لا كبير ولا صغير الكل يقف في صف حتى يحيي على ابو قاسم وكانهم اطفال يقفون في مقصف المدرسة ينتظرون ادوارهم
ابو قاسم <<< اليوم مستانس : حيالله بناتي
البنات : الله يحييك
هناء وهي تظرب امل وتتكلم لها بالعدال : املوا يالله قولي لابويي
امل : مو وقته احين ابويي توه جاي تعبان انتي ما تحسين .
هناء : اففففففففف يالله عاد
ابو قاسم : شفيش باباه امل مع هناء
امل : هااا<<< متفاجاة لا لا يبه ما فيني شي
ابو قاسم : تعالي يمي امل ابيش
راحت امل يم ابوها
امل : نعم يبه
ابو قاسم : قولي الي عندش احس فيش شي او انش تبين شي
امل وهي توجه نظرها الى اختها هناء وهناء تسوي لها حركات بمعنى قولي يالله
امل : امممم <<< مترددة لا بس احين اجازة واحنا كل قاعدين في البيت ويا ريت تشتري لنا كمبيوتر عشان نقضي وقتنا فيه
هناء : هي صح وبعد عشان يرفع محصولنا الدراسي
ابو قاسم : اول شي هناءو انتي سكتي يا سودة الوجه >>هناء احمر وجها من الفشيلة << بعد النسبة الي جبتينها لازم ما تنطقين ولا تقولين شي 68 شنو اسوي بالله عليش
هناء وهي تتحلطم بصوت منخفض : خله يحمد ربه اني ما رسبت
ابو قاسم وهو يبتسم : وانتي بنتي امل على النسبة الحلوة الي جايبتنها تستاهلين كمبيوتر واكثر بعد
هناء وهي تناقز الاااااااااي وناسة ايوة عاشو كلولولولولولوش
امل وهي اطالع اختها اشلون فرحانة وتبتسم وتحب راسها ابوها : مشكور يبة ما تقصر الله لا يحرمنا منك
ابو قاسم يرد لها بابتسامة
هناء يوم شافت ان اختها باست ابوها راحت تبوسه بعد <<هني العكس الكبيرة تقلد الصغيرة
هناء : مشكور واجد
ابو قاسم ما حب يكسر بخاطرها رد لها بابتسامة
امل : يالله هناء اني اقنعت ابويي والي عليي سويته عاد باقي انتين تقنعين قاسم يمد لنا خط انترنت من شبكته وما اعتقد يرفض ليش طلب لانش غالية عليه
هناء : اعجبش ولا يهمش بقول له اليوم
امل : ان شاء الله
وبعد تقريبا نص ساعة اجتمع الاهل في الصالة
منتظر( زوج منى ) : اوه زين عجل مبروووك << قالو له عن الكمبيوتر
امل : الله يبارك في حياتك
هناء : عاد انا لي طلب
منتظر : تفضلي
هناء : ابيك تسوي لي ايميل ما يسوى جدي كمبيوتر بلى ايميل وبعد ابيك تسوي ليي ايميلين ايميل باسم بنية وايميل باسم صبي عشان اسوي مقالب الى ربعي
امل : يا علي هناء مو وقته احين لحين ما جابو الكمبيور وانتي جدي طلب وراء طلب عجل لو جابوه شنو بالسوين
منتظر : هههههههه عليش سوالف هناءو اوكي ولا يهمش بسوي لج ان شاء الله هالايام
كاظم : أي صح امل الف الف مبروك على النتجية
امل بوجه مبتسم وخجلان : الله يبارك في حياتك
وتدخل ام قاسم وهي حاملة الاكل ( مكسرات و فواكه وكيك وعصير والحلاوة )لان يوم واحد في الاسبوع تجتمع العايلة
ام قاسم : تفضلو
زهور ( بنت منى ) : الااااي ماما ماما واوا <<< واو = حلاوة
منى : هههه انزين امل عطيني حلاوة الى زهور تبي
امل : ان شاء الله
وتتقرب من زهور : تفضلي يا قمر خالتها
وتعم المكان السوالف والضحك بين افراد العايلة وبهذا انتهى هذا اليوم بسلام على عائلة ابو قاسم
ولم يمر اسبوع حتى اصبح الكمبيوتر في حجرة البنات ( هناء وامل )والفرحة لا توصف في قلبهم
امل : الااااي وناسة بقرا ليي قصص بكيفي
هناء : اففف احنا ويا هالقصص انا بكلم ربعي في الماسنجر
امل : اني الصراحة بكلمهم بس بعد بقرا قصص عشان استفيد
هناء : كيفش ولا بعد ترى بنسوي بالوقت ساعة ليي وساعة ليش (( احين كل جدي معظم عائلات البحرين ))
امل وهي تبتسم : كله واحد
عاد تبدا هناء على الكمبيوتر ما خلت اغنية الا نزلتها ولا برنامج ما نزلته ولا صورة ما سيفتها في الكمبيوتر بعدها مرت ساعة
دخلت امل الحجرة وهي فرحانة لاول مرة تقعد على كمبيوتر تقريبا مالها: يالله هناء مرت ساعة دوري
هناء : لاااااااااااا والله ما يصير اصلا اني طول الوقت الي قاعدة فيه كنت انزل الماسنجر وادور صور واغاني يعني حقش وحقي
امل : اولا اني ما اسمع اغاني بس امممم معاش حق بعد ساعة برجع
هناء بابتسامة عريضة : تعجبيني
في جهة اخرى بتول مع اختها منى في التلفون
بتول : صراحة منوي ابويي وااااااجد مدلع هالاثنتين
منى : معاه حق على امل لان صراحة شطورة
بتول : لكن جدي بخرب البنات
منى : امل ما اعتقد تتاثر بالانترنت لكن هناء جايز
بتول : لا تحسبيني بخليهم على راحتهم شوفيني بس شنو بسوي
منى : حرام عليش خلي هالجهال على راحتهم لا تكدرينهم
بتول : شنو شنو جهاااااااال لا والله كل وحدة شطولها شعرضها وحدة 15 سنة والثانية 18 كبار مو جهال والله
منى : ما ادري شقول والله
بتول : ......
نهاية الجزء الاول
* شنو خطة بتول معقولة اسوي شي يضر خواتها؟
* هل معقولة الانترنت باثر بهم وخصوصا امل بشخصيتها الهادئة ؟
ونلتقي في الجزء الثاني
2006-07-02, 01:59
الحــ ღღ ـــب العـــ ღღ ـــذري 
