الحــ ღღ ـــب العـــ ღღ ـــذري

وفي الحجرة
قاسم وهو مصدوم : ريييييييييم
ابراهيم :أي ريم
قاسم : وشنو الي وصلها هني
ابراهيم : ترى وانا عند باب بيتكم حامل الاغراض بركب السيارة شفتها وسالتني عنك ويوم عرفت انها ريم خليتها اجي هني
قاسم وهو يتحرك في الحجرة شمال ويمين: مبييي وشنو اسوي احين
ابراهيم : تعوذ من ابليش وروح كلم اختك ترى مهما يكون من لحمك ودمك
قاسم وهو متردد : يعني تبيني اقول لها انش اختي؟
ابراهيم : مافيها شي حبل الكذب قصير وخلها تعرف منك احسن من انها تعرف من غيرك
قاسم : انزين واحين هي في وين؟
ابراهيم : في المجلس يالله توكل على الله
قاسم : بسم الله الرحمن الرحيم .يالله امش معاي؟
ابراهيم : شوو وانا شنو دخلني انت واختك وليش اقعد معاكم؟
قاسم : يؤؤ صدق نسيت يالله يالله مشينا
قاسم وهو ينزل من الدرج دقات قلبه كااانت سريعة وحاس من كثر ما دقات قلبه سريعة وقوية حاس ان قلبه بيطلع من مكانه لان عن جد صعب عليه ان يقابل الفتاة الي في يوم من الايام فكر انها تكون شريكة حياته واحين يقابلها اخته من لحمه ودمه
اول ما وصل المجلس سم بالرحمن وتوه بيدخل لقى ام ابراهيم طالعة
ام ابراهيم وهي ما تدري بوجود قاسم : ما شاء الله عليها مزيونة
قاسم بتردد : هلا يمه
ام ابراهيم وهي فرحانة : هلااااااا بوليدي روح ادخل يالله تراها تنتظرك
قاسم : ان شاء الله . وتوه بيدخل جودت يده ام ابراهيم
ام ابراهيم : ما شاء الله عليها مادبة واجد ومزيونة بعد
قاسم ابتسم لها وفتح الباب لقاها بجثتها الصغيرة وووجها البريء تنهد لان من المستحيل حاليا يفكر فيها كما كان لان بكون حرام
قاسم : السلام عليكم
ريم رفعت راسها وفي قلبها فديته : عليكم السلام
وبعد سكوت
ريم : شلونك احين قاسم؟
قاسم : بخير وانتي شخبارش؟
ريم : الحمد الله ربي يسلمك
وبتردد قاسم : اممم بغيتي شي ؟
ريم وهي ترفع راسها وتحس في شي مو فاهمته : هاا لا بس حبيت اسال عنك اشوفك من مدى ما داومت
قاسم : أي انا قدمت استقالتي
ريم : سمعت من فاضل (( الفراش )) لكن حبيت اعرف الاسباب يمكن اقدر اساعدك
قاسم وهو يتنهد : ريم ابي اقول لج كلام ويا ليت تسمعينه برحابة صدر وانا عارف انا مثل ما انصدمت اكيد انتي بتنصدمين بس ...... هذا قضاء الله وقدره
ريم والخوف ماكلها : قاسم شصاير خوفتني؟
وريم كانت الافكار تتضارب في راسها خافت انه يكون سال عنها سمع أي شي عن ابوها او امها المتكبرة او او او
قاسم : يا ريم انا بعد ما عرضت عليش الشي الي ابيه في اني اطلب يدش
ريم وبخوف جدا : اي
قاسم : اول ما سمعت اسمش كامل ......
ريم تقاطعه : لا تكمل اكيد سمعت شي عن امي او ابوي وحبيت تتراجع عن قرارك ( وهي تحبس دموعها ) معاك حق وانت حر في حياتك . ويالله استاذن احين
قاسم : لااا مو جدي يا ريم
ريم : قاسم لا تخبي علي لان عارفة ان جدي السالفة
قاسم : لا يا ريم السالفة اول ما سمعت اسمش عرفت انشش .... انشش اختي من ابوي
ريم وهو قادرة تستوعب ودقات قلبها تسرع وتحس نفسها مختنقة مو قادرة تتنفس وكان المكان خلى من الهواء
ريم : شنووو قاسم انت اخوييي؟
قاسم : ايوة يا اختي انتي اختي من ابوي
ريم وهي تصيح : لااااااااااااااااااااااااااااا اااااااااااااااااااا اااااااا
وضجت هذي الصرخة البيت كامل وكل نزل من فوق وهو يركض يسال عن الاسباب وكلهم توجهوا الى مصدر الصوت
قاسم والي ما منع نفسه من انه يضم اخته : خلاص يا ريم صلي على النبي الي صار صاار
ريم : لااا ما اصدق ما ابي شلوووون مو قادرة استوعب شي
قاسم : بس خلاص هدي شوية
ريم : ما ابييي اكيد تجذب علي والي يرحم والديك قولي انك تجذب عليي الله يخليك
قاسم : .....
ريم : ابوس رجلك ابوس يدك قولي انك جذاب وقاعد تمزح . قاسم تكلم شفيك ساكت
وبعد مدى سكتت ريم وراحت عالم ثاني عالم مافيه الا الظلم والماسات عالم القوي يغلب الضعيف الكبير ياخذ حق الصغير عالم من الهم والحزن وما تسمع الي يدور حواليها
ام ابراهيم وهي تاخذ ريم من حضن قاسم وتحضنها : خلاص يا ريم قطعتي قلبي
وكانوا البنات يصيحون ودعاء تحاول تخفي دمعتها الي نزلت وما قدرت على الصمود ومها في حضن اختها دعاء وهديل لجات الي اخوها ابراهيم الي كان منزل راسه لانه الوحيد الي يعرف الاسباب



في بيت ام قاسم
هناء وهي على الكمبيوتر
هناء : يا ربي مو عارفة شنو اسوي هالشات بعد ما ادري شفيه مو راضي يدخل معاي ماليي الا اتصل في ضحى بشوفها
ضحى بدلع : الووو
هناء : قوة
ضحى : يقويش
هناء : ضحوووي بقول لج شي وابي مساعدتش
ضحى : افااا علي تامرين امر
هناء : عااد السالفة ما يبي لها تلفون تعالي البيت
ضحى : امممممم خلاص دقايق وجاية عندش
هناء : اوكي انتظرش باي



وفي بيت ام ابراهيم
ام ابراهيم : هديل يمه روحي جيبي ماي الى ريم
وريم كان شكلها يرثى عليه دموع تنزل من غير صوت بكاء وونينها كان ينسمع وقاسم قاعد جنب اخته يخفف عليها البنات كانوا موجودين حواليها اما ابراهيم فطلع برى لان ريم انكشف شعرها من صياحها وحركتها
ام ابراهيم : سمي وشربي لج شوية ماي
ريم وهي تاخذ الماي وتشربه
وبعد مدى من الهدوء الي كان ينسمع بس صوت انين ريم
ريم وهي ترفع راسها الى قاسم : قاسم يعني احين انت اخوي
قاسم : أي اختي وافتخر فيش
ريم تنهدت : كان خاطري اتعرف على مرت ابوي وعيالها بس ....
قاسم : يعني انتي تعرفين ان ابوش متزوج؟
ريم : أي اعرف كان ابوي كل وحدة تكمل ال 12 سنة يخبرها
قاسم : عجل احنا الي ما كنا ندري عن شي والله يساعد امي لو درت شنو بكون حالها
ريم ولحين دموعها تنزل مو قادرة تستوعب الي صار : اصدق يا قاسم اني لحين مو مصدقة وبدات بالبكاء الي يقطع القلب
واخذ قاسم اخته وطبطب على ظهرها ويحاول يهداها لان هو عاش الصدمة هذي واذا كان هو رجال وما قدر وصاح عجل شلون بنت بطبيعتها الحساسة والرقيقة اكيد بكون حالها جدي واردء بعد



وفي بيت ام قاسم وفي المجلس وعلى هناء الي تقدم العصير الى ضحى
هناء : وهذي مشكلتي ومو عارفة شسوي؟
ضحى وبجدية وااضحة : الله يهداش انتي خبلة اشوفين الصبي شكثر مادب ومحترم تقومين ازعلينه لازم تنتظرينه يدخل مرة ثانية وتعتذرين منه اكبر اعتذار بالدنيا لانش فعلا غلطانة عليه وزوود
هناء : مو انا عارفة اني غلطانة وابي اعتذر بس الشات ما يدخل معاي
ضحى : شقول بس انزين ليش ما تعطينه ايميلش لان كل جدي الشات يسوون له فورمت على طولل وخصوصا في العطل لان يكون مزدحم بالناس
هناء : اول خلني اشوفه بعدين اعطيه ايميلي
ضحى : ان شاء الله اشوفينه

في بيت ام ابراهيم
ريم : يالله اخليكم تعبانة بروح ارتاح
قاسم : ريم شنو بسوين؟
ريم : ما ادري مو قادرة افكر بشي
قاسم : انزين اخذي رقمي وخلينا على اتصال
ريم : حاظر يالله عطني
قاسم : ******39
ريم وتسجله في تلفونها : اوكي شكرا مع السلامة
قاسم : العفو في حفظ الرحمن
وطلعت ريم ومو عارفة وين تروح بالضبط عيونها لحين محمرة ويبين عليها اثار الصياح ومو حابة تدخل في تحقيق مع امها ومو قادرة اشوف ابوها خصوصا بعد الي صار
وقفت سيارتها جنب بحر وطلعت من السيارة وقعدت على الرمل وهي حزييينة
كانت تناظر البحر كل شي فيه يدل على الحزن الصخور والامواج تضرب الصخور كانها غضبانة على الي يصير ما حرمت نفسها انها تصيح لان البكاء يريح القلب ولان غريبة قصة الدمعة تريح جفن العين وهي في قمة احزانها ضمت رجلها الى صدرها حطت راسها على رجولها وبدات بالبكاء بصوت مسموع وبعد مدى رفعت راسها على صوت انطلق الى اذنها احست بالارتياح عند سماعه . نعم صوت الاذان ان صوت الاذان كان كالدواء الي جرح في قلبي تلك الفتاة التي جرحها الزمن بقسوته
قامت ريم من مكانها وحست بالثقل حست بصداع من كثرة الصياح وزحفت نفسها زحاف الى السيارة وهي تجر خلفها اذيال الخيبة . واتجهت الى اقرب مسجد وصلت فيه وبعدها قامت تقرا القران وكانت كل صفحة تقلبها لازم تكون فيها اثر لقطرات من دموعها



تحطمت امالي التي كنت اختار


ونثرت كما ينثر الغبار


وابت اجفاني ان ترحل في احلام الليل


وتترك النهار


واصبحت على الدنيا بمعيار


حتى غدا قلمي لا يستطيع على اتخاذ القرار

وعقلي لا يفرق بين الجنة والنار



مضى ذلك الوقت القصير وكانه دهر بالنسبة لريم لا تعلم الى اين تذهب الى اين تتجه وفجاة قطع تفكيرها صوت النقال
ريم وبصوت مبحوح يبان عليه الحزن : الو
قاسم : ريم وينش؟
ريم : ما اعرف
قاسم وبجد : شنو ما تعرفين رييييييم وينش؟
ريم : صدقني ما ادري ما اعرف السيارة ودتني هالمكان وانا ما ادري وين
قاسم بعصبية : لا حول الله
وحاول يهدي شوية
قاسم : ريم صلي على النبي وروحي بيتكم تراها الساعة 10 والليل خيم المكان يالله قومي
ريم : ان شاء الله
قاسم : يالله وانا بتصل فيش بكرة ان شاء الله
ريم : ان شاء الله مع السلامة
قاسم : الله يسلمش
ومن حسن حظها انها يوم دخلت كانت امها في بيت جيرانهم وبسرعة راحت حجرتها وكانت موجودة حنان وشافت شكل اختها عرفت انها فيه شي
حنان وبحركات تسال ريم شفيش
ريم : ما فيني شي
حنان وباصرار على اختها تسوي لها حركات بمعنى شفيش؟
ريم : حنان خليني بروحي شوية
حنان وبنظرة حزن قعدت على سريرها مرة ثانية
وريم بس بدلت ثيابها قعدت على سريرها ولحفت نفسها وغطت وجها وبدات بصياح مرير
وحنان يوم سمعت صياح ريم خافت وبسرعة راحت الى اخوها حسين في حجرته
حنان وفي تدز حسين ان يجي معاها الحجرة
حسين : لحظة شفيش
حنان وهي تسحب فانلته
حسين : لحظة يا بنت الاوادم . شفيش
حنان تسوي لها حركة بصبعها على خدها يعني دموع
حسين : منو يصيح
حنان تسوي له حركة بيدها تعال
وراح ورى اخته وسمع صوت انين وصياح ريم
حسين : ريييييم
ريم بدات بصياح اكثر من قبل
حسين يرفع للحاف عن وجه اخته وانصدم لما شاف عيونها شلون متورمة
حسين : ريم حبيبتي شفيش بسم الله عليش
ريم وهي تقوم من مكانها وتحضن اخوها : حسييين الحق علي
حنان وهي اصيح خايفة على اختها
حسين : ريم هدي وفهميني شسافة
ريم : شقولك شنو احكي بس
حسين : كل الي في قلبش كل شي
ريم : تذكر قاسم الي قلت لك عنه
حسين : أي اذكر شفيه
ريم والعبرة تخنقها : طلع اخوي اخوي يا حسين
حسين وهو مصدوم ويضم اخته ومن قهره غض شفاه وتوعد على نفسش انه يكون عون الى اخته
وحنان لما سمعت السالفة خافت زوود وراحت سريرها وتلحفت وكانها خايفة ان احد يجي لها
حسين وهو يناظر خواته حنان الصدمة الي صادتها اثرت فيها وفقدتها حاسة النطق وحاولوا مرارا يعرضونها على دكتور نفسي لان حالتها كانت صعبة بس لحالهم المادي الصعب واحين ريم خاف يفقدها بعد وكان الرعب مالي قلبهم ثلاثتهم



وفي بيت ام قاسم
هناء دخلت الشات وحصلت امير الغرام وطلبت منه يضيفها في البداية رفض خوف عليها وبعدين من اصرارها وافق بس عشانها وفي الماسنجر

- - --^[ امير الغرام ]^-- - - : أي يبين اني مهم والدليل كلام امس
°·.¸.•° وجه القمر °·.¸.•° : امير ترى اني قلت لك اني كنت في وقت مضايقة وما ادري شنو اقول
- - --^[ امير الغرام ]^-- - - :خلاص حصل خير
°·.¸.•° وجه القمر °·.¸.•° : اسفة واااجد واتمنى تقبل اعتذاري وخل في بالك ان الكلام الي سمعته امس من وحدة خبلة ومهبولة
- - --^[ امير الغرام ]^-- - - :لا لا ما ارضى تقولين عن نفسش جدي وخلاص انا قبلت الاعتذار
°·.¸.•° وجه القمر °·.¸.•° :صدق شكككرا
- - --^[ امير الغرام ]^-- - - :العفو ولو المسامح كريم
°·.¸.•° وجه القمر °·.¸.•° : تسلم لي والله
- - --^[ امير الغرام ]^-- - - :الله يسلمش . وجه ترى انا اخذت ايميلش وانا مغصوب مو اظنين اني مثل الشباب ترى انا غير
°·.¸.•° وجه القمر °·.¸.•° : لا لا انا اعرفك وادري ان بسببي
- - --^[ امير الغرام ]^-- - - : اوكي شخبارش بعد ؟
°·.¸.•° وجه القمر °·.¸.•° : تمام وانت شخبارك؟
- - --^[ امير الغرام ]^-- - - :بخيير ربي يسلمش
°·.¸.•° وجه القمر °·.¸.•° : دووووووم
- - --^[ امير الغرام ]^-- - - :دامت ايامش
°·.¸.•° وجه القمر °·.¸.•° : معاك
°·.¸.•° وجه القمر °·.¸.•° : اووه اشوفه حاط صورة سامي يووسف
- - --^[ امير الغرام ]^-- - - :أي لان يعجبوني اناشيده
°·.¸.•° وجه القمر °·.¸.•° : صراحة اني اسميهم اغاني
- - --^[ امير الغرام ]^-- - - :كل انسان وله رايه
°·.¸.•° وجه القمر °·.¸.•° : يعني ما تسمع اغاني؟
- - --^[ امير الغرام ]^-- - - :لا وشنو لي بالاغاني
°·.¸.•° وجه القمر °·.¸.•° : يعني مثل اختي امل
هناء سكتت : بل بل قلت له اسم اختي
°·.¸.•° وجه القمر °·.¸.•° : اووه سووري
- - --^[ امير الغرام ]^-- - - :لا لا عادي لا تحاتين
وضلت تتكلم معاه مدى طويلة

وفي بيت ام ابراهيم وفي حجرة ابراهيم
قاسم : وين الاغراض
ابراهيم : كاهم تفضل
قاسم : شكرا
وقعد يتبعث في الاغراض
قاسم : ابراهيم شنو تتوقع في في الظرف
ابراهيم : ........
قاسم وهو يخلي الظرف على جنب : ابراهيم شفيك سرحان . هييي ابراهييييم
ابراهيم : هااا لا لا ما فيني شي
قاسم ك شنو ما فيك شي وانا صار لي ساعة اناديك
ابراهيم : يا العيار قعدتنا هني ما صار لها نص ساعة تقول لي صارلك ساعة تناديني
قاسم : هههه مو قصدي شي . بس صدق شفيك سرحان
ابراهيم : سلامتك . شنو كنت تبي؟
قاسم : كنت بسالك تتوقع شنو في الظرف
ابراهيم : ما ادري افتحه شوف
وتوه بيفتحه الا والباب يطقونه
ابراهيم : لحظة لا تفتحه عشان بكون معاك
قاسم : بل بل يدخل عصه في شي ما يخص ههههههه يالله كوا خليناه
ابراهيم بضحك : اصلا غصب عنك
وفتح الباب شاف اخته هديل واقفة
ابراهيم : هلا هديل شنو بغيتي
هديل : ما ابيك انت ابي قاسم
ابراهيم الى قاسم الي قاعد على السرير : قوم قوم هديل تبين شكلي انا الي بفتح الظرف
قاسم وهو ياخذ الظرف معاه : بروح مع الظرف هههههههه
ابراهيم : لا تخاف اذا فيه فلوس ما ببوق شي
قاسم وهو يرفع للحاف ويخلي الظرف تحت للحاف : هههههه جدي احسن حل
ابراهيم : ههههههه اوكي
ويطلع قاسم الى هديل
قاسم : هلا هديل نعم
هديل : تعال شوية معاي
قاسم وهو يرفع حاجب : ليييش؟
هديل : تعال ما بسوي فيك شي انزين خل ابراهيم يجي معاك اذا خايف ههههههه
قاسم وهو يقلد ضحكتها : ههه لا لا مو خايف ما ابي يجي معاي
ابراهيم : امش امش بجي معاكم غصبن عنكم
وراحوا وهم يضحكون
ودخلوا حجرة الكمبيوتر
هديل : تعال اقعد كلم اختك امل اون لاين
قاسم مصدووووم : امل
هديل : أي امل شفيك جدي متروع
قاسم : لا يكون قلتين لها اني معاكم
هديل : لا قلت لها عندي لج مفاجاة
قاسم : اشوى . سووري هديل ما اقدر لان شوية ضروووف
هديل بحزن : يؤؤؤ احين شقول لها المفاجاة
قاسم : أي شي
وطلعوا عنها وهديل تافافت لانها ظنت بهذا الشي بتفرح قاسم
ابراهيم وهو في الحجرة : شلون جدي مو فاهم شي ؟
قاسم : الله يسلمك يوم كنا في السيف >>> وقال له السالفة
ابراهيم : اها يعني
قاسم : أي
ابراهيم : انزين يالله افتح هالطرد جاني فضول
قاسم : يالله
وفتح الظرف ................



هههههه احين بدعون عليي لان انهيت الجزء الخامس في نقطة حساسة بس يالله اخليكم شوية تتشوقون



مثلما القلب ينقسم الى نصفان
الحب والكراهية


كذلك الحياة تنقس الى نصفان


الفرح والحزن


وانظر الى احزان غيرك حتى تعلم

ان هناك حزن اكبر من حزنك

وان يوما جرحك الزمن
لا تظن انها نهاية حياتك
ولا تكون حياتك سوى
سرد جرحك حتى تكون مركز شفقة
ومثلما يقول المثل
( لا تقل للناس جرحا انت صاحبه فالجرح لا يضر الا من به الم )






الحياة تمشي والوقت يجري ونحن انهينا الجزء الخامس من قصتنا الحب العذري واتمنى ان يكون هذا الجزء نال اعجابكم

توقعاتكم :
* ريم شنو بصير فيها بعد الي سمعته ؟
* وحنان شنو سبب خوف هالطفلة ؟ واحين عرفنا ان فقدت حاسة النطق بسبب صدمة يعني تتوقعون شنو هالصدمة ؟
* وهناء ولعبها بالنار شنو نهايته ؟ وامير الغرام شنو من الممكن بكون في حياتها ؟
* والظرف وصل الى قاسم ؟ شنو بصير في قاسم ؟

مع تحياتي
بسمة الم

قصة رائعه الله يعطيك العافية