الفصل الاول من الجزء الثالث
نبدا الجزء الثالث باحد ايام الاسبوع يوم تجمع عائلة ابو قاسم وهو يوم الخميس
وصل الجميع الساعة 12 ظهرا وبعدما كل فرد ادى فريضة الظهر وجلسو في الصالة ينتظرون قدوم قاسم للغذاء جميعا >>> ليش انه احين ما يشتغل لازم يتغذى معاهم
بتول : هااا هناءو واملوا شخباركم مع الانترنت ؟
هناء : شقول وشخلي كشششششششخة بس ما اعرف اشرح ليش شحلوه لان ما عندكم كمبيوتر >>> بل تعطي في الوجه
امل : انا زينة مستانسة وااجد واكثر شي مفرحني اني اقرا قصص براحتي
بتول : زيييييين دووم الفرحة مالية قلوبكم >>> غريبة
منى ابتسمت على رد بتول لهم حست ان خلاص تفكيرها كان وقت عصبية لا غير
هناء بتقوم
بتول : على وين ؟
هناء : بروح اقعد على الكمبيوتر
بتول : الله وياش >>> شصااااااير
هني منى وام قاسم طاروا من الفرحة شافو معاملة بتول مع خواتها صارت اوكي
في حجرة البنات هناء دخلت ايميلها شافت علي اون لاين ستانست حدددددددها
هناء تسمع صوت اخوها برى فخافت يدخل عليها مرى وحدة
°·.¸.•° وجه القمر °·.¸.•°: اوكي اخليك عمري بعدين اشوفك
,.-~*'¨¯¨'*·~-.¸-(_ برشلونة للابد _)-,.-~*'¨¯¨'*·~-.¸ :
وين حياتي؟
°·.¸.•° وجه القمر °·.¸.•° : بقوم اتغذى >>> الجذب راكبها من راسها الى كرياسها
,.-~*'¨¯¨'*·~-.¸-(_ برشلونة للابد _)-,.-~*'¨¯¨'*·~-.¸ : عليش بالعافية
°·.¸.•° وجه القمر °·.¸.•° : الله يعافيك باي
,.-~*'¨¯¨'*·~-.¸-(_ برشلونة للابد _)-,.-~*'¨¯¨'*·~-.¸ : باي
وسكرت كل شي وطلعت برى الحجرة
منى : اخوي سمعت من امي انك مفنش
قاسم سكت وما تكلم .........
امل ما حبت ان تحرج اخوها
امل : قمر خالتها وعيون خالتها وعبود وسارة وفطوم تعالو ابيكم في الحجرة
الجهال : الااااااااي
ويروحون وراء امل الحنونة
امل وهي تمر على اختها هناء : هناء تعالي الحجرة ابيش شوي
هناء فز قلبها خافت امل عرفت عن علي او شي فراحت وراء اختها تعرف شسالفة
اول ما دخلو الحجرة
هناء : شسالفة؟
امل : ولا شي وبصوت منخفض : بس ما حبيت احرج اخويي لان احس فيه شي ومتردد يقوله تحتنا يمكن
هناء : أي اني بعد حسيت
امل : وما تلاحظين بعد في عيونه نوعا ما من الحزن
هناء : بلى لاحظت
ملاك : خالة امل شنو تبين فينا؟
امل : امممم براويكم صور في الكمبيوتر حلويييييييين
هناء وهي تحط يدها على خصرها : لا واللللللللللللللله الكمبيوتر محد يقعد عليه من الجهال
امل : لكن انا الي بقعد عليه وهم بس يطالعون
هناء : انتي ما تفهمين >> وهي تضربها على راسها اقول لج ما في قعدة يعني ما في
امل : خلاص عجل بقول لكم قصة
الجهال : الااااااااااااي
ملاك : يالله خالة قولي لنا
امل )) وتقول لهم القصة )) وهناء قعدت على الكمبيوتر
وفي خارج غرفة البنات
قاسم : لو سمحتون سكروا السالفة ما ابي اتكلم فيها
منى : اخوي يمكن نقدر نساعدك
قاسم : ...............
ام قاسم : قول يا وليدي مثل ما قالت اختك يمكن نقدر نساعدك
قاسم : محد يقدر يساعدني لان السالفة ......... رجاء لا تخلوني اتكلم غصب ما ابي اتكلم (( والدمووووع خلااااااص طاحت من عينه )) ويقوم يروح حجرته
ام قاسم : يا حسرتي على وليدي
منى : احس فيه شي جايد
بتول تتكلم مع نفسها : اففففففف هذا وقته مفنش احيين احين شلون.......
وتقاطع تفكيرها منى : تتوقيعن شفيه قاسم ؟
وتقوم بتول وهي منقهرة : واني شدراني >> يا ترى شنو علاقة شغل قاسم وتفنيشه ببتول >>> غموووووووض
قاسم يطلع من الحجرة وعيونه محمرة
ام قاسم : يمة وليدي وين بتروح ؟ ما بتتغذى ؟
قاسم : لا يمة ما بتغذى
ام قاسم : انت ما اكلت شي من البارحة كل لك لو لقمة
قاسم : لا يمة بطلع برى اشم لي هواء واشوف العالم >>> بسم الله شصاااااير
ام قاسم : براحتك يا وليدي
من جهة اخرى بتول مع صديقتها في التلفون
بتول : فنشوه العلة
سارة : يؤؤؤؤؤؤ عجل اطرش المحادثات على وين
بتول : ما ادري حضرته ما حصل الا احين يفنش لكن ابي قاسم هو نفسه الي يدري لان عصبي ويمكن يسوي شي فيهم
سارة : اممممم ما ادري
بتول : شرايش ادزينهم على عنوان البيت وتكتبين ان هالطرد الى قاسم
سارة : اوكي مو مشكلة
سارة : وعلى فكرة بعد اختش امل لحين ما قبلت الاضافة
بتول : قريب قريب انتين انتظري بكون معاش على اتصال ووقت ما اقول دزي المحادثات دزيهم ولا تنسين مع الرسالة الي قلت لج عنها اوكي
سارة : اوكي
نبذة عن سارة : سارة صديقة بتول من ايام الثانوية ظلت صداقتهم لهذا الوقت لان سارة بالضبط صفاتها مثل بتول من خلال الحقارة والتسلط ومثل ما يقول المثل (( الطيور على اشكالها تقع ))
قاسم مع صديقه ابراهيم
ابراهيم : قول قول الي في قلبك يا الاخو لا اتعب حالك خفف شوية عن نفسك
قاسم : شقول لك صدمة مثل الصاقعة ما عرفت اتصرف سيدا قدمت استقالتي
ابراهيم : قول قول يمكن اقدر اساعدك وهو يطالع في عيون صديقه يعطيه الامان
قاسم وهو يرجع بذاكرته للوراء
قبل سنتين دخلت فتاة الشركة تقدم على وظيفة وطالعتها بنظرة اعجاب يمكن لشكلها الملائكي والطفولي وما ادري حسيت بشعور اتجاها غريب ما افهمه ولا اقدر اعبر عنه بعد تقريبا شهر ونصف دخلت مع رئيس الموظفين
رئيس الموظفين : تفضلي ريم هذا مكتبش وبكون معاش في نفس الحجرة وتقريبا شغلكم مقارب الى بعض قاسم واذا محتاجة مساعدة ساليه ما بقصر
ابتسمت ريم ابتسامة بريئة وناعمة ريم هالاسم رن في اذوني وطاحت دمعته على خده مغصوبة انها اطيح بسبب الجرح العميق
ابراهيم : لا تهزك بنية اخوي هي ما تسوى ولا ظفر منك
قاسم : لا هي مالها ذنب المسكينة بس الزمن وقساوته وبعد شوية سكووت ياربيييييي شنو سويت من ذنب عشان تعاقبني بالانسانة الي احبها لييش يا ربي ليش
ابراهيم : استغفر ربك هذا قضاء الله وقدره
قاسم : استغفر الله رب العالمين
ابراهيم راح جاب الى صديقه شوية ماي وبعد ما شرب قاسم الماي
ابراهيم : كمل وان شاء الله اقدر اساعدك
قاسم وبنظرة ياس : ان بكمل بس هذي المشلكة الوحيدة الي ما لها حل يرضيني وبتقول قاسم قال
ابراهيم : كل مشكلة ولها حل كمل كمل وقول الي في قلبك
قاسم : اشتغلت معاي هالانسانة اصبح على وجها وامسي على صوتها تعودت عليها اتكلم معاها وامزح وبكل صراحة حبيتها من كل قلبي وسكت شوية واخذ نفس
قاسم : ويوم جمعت مهر وصرت قادر على الزواج مشيت صوبها بخطوات وياليت ما خطيت هالخطوة
قاسم : ريم
ريم وهي ترفع وجها وتناظره بعيونها البريئة : نعم
قاسم : الله ينعم بحالش . اممممم بصراحة ودي اقول لج كلام من زمان كنت ابي اقول له
ريم : تفضل
قاسم : اممممم انا معجب بكل شي فيش وبكل صراحة حاب اتقدم ليش
ريم هني نصبغ وجها من الحيا
قاسم : اممم ويا ليت تعطيني اسمش كامل والمنطقة الي عايشة فيها وان شاء الله نزوركم قريب
ريم : اسمي ريم عبد العزيز الفلاني
ابراهيم : لا اله الا الله
قاسم وبصوت مبحوح ومعاه دموع: توقع يا ابراهيم الانسانة الي حبييييييتها اختي اختي يا ابراهيم
ابراهيم تقطع قلبه على صديقه
قاسم : ما كفاه معاملته مع امي ومعانا يقوم يتزوج على امي والله امي ما تستاهل
ابراهيم : الله كريم الله كريم يا الغالي
قاسم : ونعم بالله والله احسه مو ابونا وانا الي كنت اظنه ابو بكل معنا الكلمة وسند لي اذا كبرت وفي النهاية يطلع انسان ....... شقول بس ما ابي احصل ذنب بسببه
ابراهيم : ......
قاسم وهو يصيح : هذي مشكلتي قولي شنو حلها يصير اتزوج اختي هااا يصير
ابراهيم : .....
قاسم : اكيد بتسكت لان مشكلتي مالها حل اه يا دنيا ربي ساعدني اشيل هالبنية من قلبي
ابراهيم وهو يحظن صديقه الي في حياته مثل اخوه ويطبطب على ظهره وقاسم في قمة الحزن والدموع مالية عيونه
ابراهيم مع نفسه : والله حرام الي يسويه عبد العزيز شنو هالانسان من أي نوع
وعلى مائدة الغذاء محد كان له ياكل وطبعها ماعدا بتول وعيالها وهناء الي ما يهمهم شي
امل : الحمد الله
ام قاسم : ما اكلتي شي يمة
امل : ماليي نفس قاعدة احاتي قاسم طلعته من الساعة 12 واحين ثنتين ولحين ما رجع
بتول : بيرجع مو جاهل ما يدل البيت غصب عنه بيرجع
امل طلعت راحت حجرتها وما ردت على اختها وهي في الحجرة قاعدة تفكر في اخوها امل مع نفسها : يعني شفيه يعني معقولة جدي وفكرة اجيبها وفكرة توديها
امل : لا لا ما اعتقد خلني اقعد على الكمبيوتر ابرك لي من هالشك والظن
ودخلت على ايميلها وشافت اضافة (( سارة المزيفة والمتنكرة بشخصية علي )) قبلته وبعد تقريبا ربع ساعة قعد اون لاين
,.-~*'¨¯¨'*·~-.¸-(_ برشلونة للابد _)-,.-~*'¨¯¨'*·~-.¸ : لا بس ضايف حاب اتعرف على القمر
بســ ღღ ــمة حيــ ღღ ــياتي : اولا احترم نفسك وانت ما تعرفني عشان تقول لي قمر وثانيا سووري ما اقدر اتعرف
,.-~*'¨¯¨'*·~-.¸-(_ برشلونة للابد _)-,.-~*'¨¯¨'*·~-.¸: ما فيها شي لو تعرفت عليش وتكلمت معاش
بســ ღღ ــمة حيــ ღღ ــياتي : مستحيل باي وعطني بلوك ودليت ولا تخليني زيادة عدد
وتعطيه بلوك ودليت
امل : والله ناس متفرغة
وفي هذا الوقت يرن تلفون بتول
بتول والاكل في بوزها وهي تتكلم : وقت غذى احد يتصل صدق ما عندهم ذوق والا اشوف المتصلة سارة وسيدا تقوم تطلع من المطبخ
بتول : الو
سارة : هلا بتول
بتول : هلا بيش شصاير؟
سارة : سلامتش بس اختش امل ما قدرت عليها
بتول : افااااا ليش
سارة : بس شفتها اون لاين >>> وقالت لها السالفة
بتول : للاسف الشديد اني كان خاطري ثنتينهم
سارة : سووري بس ما قدرت اختش امل صعبة المحال
بتول : يالله معلي كوا عندنا هناءو بس وقفي معاها لعب ودزي المحادثات على البيت ولا تنسين باسم قاسم
سارة : اوكي صار
بتول : يالله باي
سارة : باي
ورجعت مكانها كملت غذاها >>> ما تقدر تقاوم
وبعد ما كمل الكل الغذاء قعدو في الصالة كلهم ما عدا الجهال راحوا يلعبون وهناء على النت بس كانت سوالفهم بسيطة وعادية لان الكل يحاتي قاسم الي طلع وما رد وخصوصا ان احين قربت الشمس تغرب
ام قاسم : يمة امل اتصلي الى اخوش شوفيه تاخر
امل : يمة انا بعد خاطري اتصل بس تعرفين قاسم معانا شلونا كل مو اوكي بس مع هناء اوكي >>> ما عرفت امل ان بعد الي صاد قاسم بيتغير 180 درجة يصير قلبه طيب وحنون وووو ... وينعرف صفاته الجديدة مع احداث القصة
ام قاسم : انزين اتصلي واني بكلمه
امل : ان شاء الله
امل اتصلت الى اخوها وعطت التلفون اختها
......... : الو
ام قاسم : الو يمة قاسم وينك؟
..........: معاش ابراهيم صديق قاسم
ام قاسم : يمة وليدي شفيه ليش ما رد
ابراهيم ما حب يصدم ام قاسم : ما فيه شي ولو بقول لج ما بتفهميني هي سوالف شغل انتي عطيني وحدة من البنات شوية بس بقول لها وبفهمها وبعدين هي تفهمش
ام قاسم بسبب خوفها على ولدها عطت التلفون اقرب بنت لها وهي (( امل ))
امل : الو نعم
ابراهيم : هلا اختي
امل : خير اخوي شصاير
ابراهيم : انزين ممكن تروحين بعيد عن خواتش والوالدة عشان ما ابيها تصير صدمة لهم وانا بسكره واذا رحتين بعيد عنهم سوي مسكول وانا بتصل وبفهمش السالفة >> يا ساتر
امل : اوكي باي
ام قاسم : ها يمة شفيه؟
امل انصدمت شقول الى امي احين وانا ما احب اجذب بس اعتقد هالجذبة بيضاء : اممم ما فيه شي بس هو يبي يفهمش ان يعني راح يقدم الى شغل ومشاغيل اذا تبي تقدم الى شغل ونسى التلفون عند صديقه
ام قاسم : يعني وقف قلبي الله يهداه يخوف الواحد
وتقوم امل عشان اسوي رنة على الاتفاق وتروح تركب فوق بيتهم عشان محد يدخل عليها ويظن فيها ظن السوء وسوت مسكول الى ابراهيم وبعد تقريبا دقيقتين اتصل
امل : الو
ابراهيم : هلا اختي
امل : ممكن اخوي تخبرني شسالفة بسرعة ما ابي اطول
ابراهيم (( محترمة هالبنية والله )) : امم شقول ليش بس قاسم تعبان شوية وطاح عليي
امل : مبي اخويي >>> وهي تصيح
ابراهيم : ابيش عون صرتي لي فرعون لا تصيحين ترى ما فيه شي بس شكله مو ماكل شي من البارحة فصار عنده نقص دم من جدي طاح
امل وهي تصيح : الله يسلمك قولي شفيه اكيد قالك
ابراهيم كسرت خاطره امل وخصوصا انها حساسة ولكن ما حب يبوح لها بسر صديقه الدفين : ما فيه شي بس شكله متاثر ان فنشوه من الشغل
امل بصوت مبحوح : انزين وانا شنو اسوي؟
ابراهيم : هم برقدونه عندهم كم يوم بس ابيش تقولين الى اهلش ان اتصل عليش وقالت ليش انه ببات عندي كم يوم
امل : انزين واذا قلت لهم يبون اعذار او سبب واحد انه يبيت عندك ببيتكم
ابراهيم : أي صح امممممم خلاص قولي لهم انه معاي عشان اروح معاه ادور له شغلة
امل : اوكي مشكوور اخوي وتحمل بقاسم
ابراهيم : العفو قاسم في عيوني
امل : اوكي باي
ابراهيم : باي
وبعد ما سكر ابراهيم عن امل راح يشوف صديقه قاسم دخل الحجرة الي مرقد فيها شاف وجه قاسم شلون مصفر وملامح الحزن مرسومة في قسمات وجهه والسيلان والاجهزة حواليه لان تقريبا مرت 5 ساعات من وقت ما فقد الوعي ولحين ما قعد فخاف ابراهيم وطلع للدكتور
ابراهيم يطق الباب
الدكتور : تفضل
ابراهيم دخل
ابراهيم : دكتور انا ابي اسال عن حالة قاسم عبد العزيز الفلاني
الدكتور : حالته حاليا مستقرة لكن اذا ما استعاد وعيه خلال 24 ساعة راح يكون خطر عليه
ابراهيم بوجه حزين : شكرا دكتور
ويطلع برى وهو حزين على صديقه قاسم وعلى الساعة تقريبا 9 ونصف مساءا اخبرت امل ام قاسم ان قاسم ببات عند ابراهيم عشان يدورون شغل . وفي هذا اليوم الكل خلد الى النوم مبكرا وخصوصا امل الي كانت تحاتي قاسم وهناء الي كان مشغول بالها في علي ليش ما دخلت >>> مسكينة مصدقة
اما احين فراح نتعرف على شخصيات جديدة راح تتداخل مع احداث القصة وتتشارك مع ابطالنا في الحزن والفرح
ابو حسين (( عبد العزيز )) = ابو قاسم في نفس الوقت
ام حسين : 40 سنة
مغرورة وشايفة نفسها واجد عن اللزوم وهي الزوجة الثانية الى عبد العزيز وعيالها عكسها تمام في الصفات بسبب الظروف
ريم : 21 سنة
بنت طيوبة وحبوبة وحلوة وشكلها طفولي جدا قلبها طيب وكبير تنحب بسرعة وكملت دراستها الثانوية فقط ودخلت معهد تدرس فيه لمدى سنة وبعدها توظفت وامنية حياتها انها تتعرف على خوانها وخواتها لان تدري ان الوالد متزوج قبل ما ياخذ امها ومسكينة ما تدري ان الانسان الي حبته يطلع اخوها
حسين : 17 سنة
صبي عادي في ثاني ثانوي وصفاته مثل اخته ريم والظروف قربت بينه وبين اخته ريم كثييرا
حنان : 13 سنة
اخر العنقود في هذه ةالعائلة وصفاتها مثل اختها ريم بس للاسف الشديد ما تتكلم والصفة الي بتعتادون عليها في القصة انها انطوائية على نفسها بسبب حالتها ولها عالمها الخاص
ابراهيم صديق قاسم : 24 سنة
قلبه كبير هالانسان صديق قاسم من ايام الثانوية مستحمل تسلط قاسم وكبريائه (( قصدي قبل الي صار )) بس احين طبعا تغيرت صفات قاسم
يتبـــــع
![:: [اعلان جديد لمدة شهرين]- منتديات سهم الاحساس - ينتهي الإعلان في 12-11-2008 ::](/E3lanat/adv/sahm-ahsas.gif)
![:: [اعلان جديد لمدة شهرين]- منتديات تؤبر تسبدي ينتهي الإعلان في 09-11-2008 ::](/E3lanat/adv/2we22.gif)
![:: [اعلان لمدة شهر]- منتديات أحلى عرب ينتهي الإعلان في 13-11-2008 ::](/E3lanat/adv/a7la3rb-3.gif)
![:: [اعلان لمدة 3 اشهر]- سعودي كام - ينتهي الإعلان في 08-01-2009 ::](/E3lanat/adv/ksacam1.com.gif)
2006-07-04, 15:29
مشاركة: الحــ ღღ ـــب العـــ ღღ ـــذري 
مشاركة: نقطة حماااس ورد وتقييم خاص ! 