حبيبي ما ابي عذرك تراك بحالتي معذور=و غيرك لو مكانك صار سالفتي يجاريها
حبيب طاع محبوبه وصاروا اّمر و مأمور=ينفذ كل قراراته و حسراته يداريها
انا اللي لازم اتعذر حبيبي واكشف المستور=وابين كل غلطاتي حاضرها و ماضيها
عرفتك جاهلا" بالحب تخبط بين ظلما و نور=و ما بين النعم و اللا حياتك كنت تقضيها
عرفتك وانت ما تفرق بين الجار و المجرور=ونار الشوق في ظنك قليل الما يطفيها
تكفلتك يتيم احساس وهبتك من خفاي شعور=وعلمتك طريق الحب حبيبي كيف تمشيها
وكل ما تعثر اقدامك اعاني كني المعثور=على كفوفي اشيلك خايف ان دربك تخليها
وعلمتك معاني العشق وتاثير الجفا والجور=وايدك بالقلم ترجف و انا اشرح في معانيها
وقلت ان الهوى غفران و ذنب الخل به مغفور=وهذي خاتمة علم المحبه عند قاريها
تجاوزت امتحان الحب و سعيك بالهوى مشكور=وجازيتك انا بقلبي وروحي صرت راعيها
قضيت ايامنا بعناد انا ابني للمحبه قصور=وطيشك يا حبيبي حطم الجنه وبانيها
ثلاث سنين من عمري يضيعن كالهبا المنثور=ما ادري وين مشواري ولا ادري عن تواليها
وتمشي سنة الدنيا و حنا والزمان ندور=انا اللي جاهل بحالي و تدري انت بخوافيها